پاکستان فلور ملز ایسوسی ایشن کا کہنا ہےکہ وفاقی بجٹ میں گندم کے ٹرن اوور پر سالانہ ٹیکس بڑھانے اور چوکر کی قیمت پر17 فیصد سیل ٹیکس کا نفاذ قبول نہیں ، اس سے 20 کلو آٹےکا تھیلا 90 روپے مہنگا ہوجائےگا۔
فلور ملز ایسوسی ایشن کےمرکزی چیئرمین بدرالدین کاکڑ اور پنجاب کے چیئرمین عاصم رضا نے لاہورمیں مشترکہ پریس کانفرنس کرتے ہوئےکہا کہ سستا آٹا شہریوں کا حق ہے، حکومت نے چوکر کی سیل پر دوبارہ سیلز ٹیکس لگا دیا۔
ان کا کہنا تھا کہ گندم کی اسمگلنگ سے متعلق صرف ذہنی فتور ہے، ایک سے دوسرے ضلع میں گندم جانےکو اسمگلنگ نہیں کہتے، 20 لاکھ ٹن تک گندم درآمدکرنا پڑے گی۔
بدرالدین کاکڑ نے کہا کہ حکومت کی 85 ارب کی سبسڈی کادعویٰ جھوٹا ہے، 13 ارب روپے کی سبسڈی دی گئی ہے ، ٹیکس ختم نہ کیا گيا تو ہڑتال کا فیصلہ کرسکتے ہيں۔