آنجہانی اداکار اور بگ باس 13 کے فاتح سدھارتھ شکلا اور شہناز گِل آخری بار ایک میوزک ویڈیو میں دکھائی دیں گے جو تاحال ریلیز نہیں کی گئی ہے۔
'ہیبٹ' نامی میوزک ویڈیو کی کچھ تصاویر انسٹاگرام کی زینت بنی ہوئی ہیں جس میں بتایا جارہا ہے کہ یہ تصاویر دونوں کی آخری میوزک ویڈیو کی ہیں۔
بھارتی میڈیا رپورٹ کے مطابق سدھارتھ اور شہناز نے کچھ ماہ قبل بھارتی شہر گووا میں ویڈیو کی عکس بندی مکمل کی تھی تاہم ویڈیو ریلیز ہونے کی تاریخ اب تک مداحوں کے ساتھ شیئر نہیں کی گئی۔
تصاویر پر مداحوں کی بڑی تعداد نے اپنے تبصرے پیش کرتے ہوئے شدید دکھ اور رنج کا اظہار کیا اور اس ویڈیو کو جلد ریلیز کرنے کا بھی مطالبہ کیا گیا۔
خیال رہے کہ چند روز قبل سدھارتھ شکلا کی ممبئی میں اپنے گھر میں اس وقت موت واقع ہوگئی تھی جب وہ سورہے تھے، اہلِ خانہ کی جانب سے بتایا گیا تھا کہ ان کی موت دل کا دورہ پڑنے کے سبب ہوئی۔