اسلام آباد ہائی کورٹ نے مریم نواز کی اپیل پر روزانہ سماعت کر کے 30 دن میں فیصلہ کرنے کی قومی احتساب بیورو (نیب) کی درخواست مسترد کردی۔
جسٹس عامر فاروق اور جسٹس محسن اختر کیانی پر مشتمل بنچ نے مریم نواز کی اپیل پر سماعت کا تحریری حکم نامہ جاری کیا ہے جس میں کہا گیا ہے کہ نیب آرڈیننس کی سیکشن 16 اے ٹرائل 30 دن میں مکمل کرنے سے متعلق ہے، اپیلوں کے فیصلے سے متعلق ایسا کوئی قانون موجود نہیں۔
حکم نامے میں کہا گیا کہ درخواست غلط فہمی کی بنیاد پر دائر کی گئی لہٰذا مسترد کی جاتی ہے۔ تحریری حکم نامے میں کہا گیا ہے کہ مریم نواز کے وکیل کی جانب سے دلائل مکمل ہو گئے، نیب کو درخواست پر نوٹس کیا جو انہوں نے کورٹ روم میں وصول کرتے ہوئے عدالت کی معاونت کے لیے مہلت طلب کی۔
نیب آئندہ سماعت پر 17 نومبر کو دلائل کا جواب دے۔