پاکستان تحریک انصاف (پی ٹی آئی) رہنما فوادچوہدری کو اڈیالہ جیل منتقل کردیا گیا۔
جیل ذرائع کے مطابق اڈیالہ جیل میں فواد چوہدری کا میڈیکل کیا جائے گا اور میڈیکل چیک اپ کے بعد انہیں بیرک الاٹ کی جائے گی۔
جیل ذرائع بتاتے ہیں کہ فواد چوہدری کو بی کلاس دینی ہے یا نہیں اس پر فیصلہ نہیں ہوسکا۔
دوسری جانب ڈسٹرکٹ اینڈ سیشن کورٹ اسلام آباد نے فواد چوہدری کی جانب سے الیکشن کمیشن کےخلاف نفرت پھیلانے کا کیس میں انہیں جوڈیشنل ریمانڈ پر جیل بھیجنے کا تحریری فیصلہ جاری کردیا۔
جوڈیشنل مجسٹریٹ وقاص احمد راجہ نے 2 صفحات پرمشتمل تحریری فیصلہ جاری کیا جس میں کہا گیا ہےکہ پولیس نے فواد چوہدری کے 7 روزہ جسمانی ریمانڈ کی استدعا کی، پولیس کے مطابق فواد چوہدری کا وائس میچ ٹیسٹ اور فوٹوگرامیٹک ٹیسٹ کروانا ہے، ان کا فوٹوگرامیٹک ٹیسٹ لاہورسے کروانا ہے، پولیس نے مؤقف اپنایا کہ وقت کی کمی کے باعث فوٹوگرامیٹک ٹیسٹ نہ کروایا جاسکا۔
فیصلے کے متن میں کہا گیا ہے کہ پولیس کے مطابق فواد چوہدری کو فوٹوگرامیٹک ٹیسٹ کیلیے لاہورلے کرجانا ضروری ہے، تفتیش کیلئے ان کا موبائل اور دیگر ڈیوائسزبرآمد کرنا لازم ہے۔
فیصلے کے متن کے مطابق پی ٹی آئی رہنما نے موبائل سم بند کرنے کی استدعا کی گئی جوپولیس کے پاس ہے، انہوں نے کہا کہ میرا موبائل فون اسلام آباد پولیس کے پاس ہے۔
فیصلے میں قرار دیا گیا کہ پولیس کی مزید جمسانی ریمانڈ کی استدعا میرٹ پرنہیں بنتی، فواد چوہدری کو 10 فروری کو عدالت دوبارہ پیش کیاجائے۔
خیال رہے کہ اسلام آباد کی سیشن کورٹ نے پولیس کی فواد چوہدری کا مزید ریمانڈ دینے کی درخواست مسترد کرتے ہوئے انہیں جوڈیشل ریمانڈ پر جیل بھیج دیا۔