اسلام آباد: احتساب عدالت نے سابق صدر آصف زرداری کے خلاف جعلی بینک اکاؤنٹس کا ایک اور ریفرنس عدالتی دائرہ اختیار نہ ہونے پر نیب کو واپس کر دیا۔
اسلام آباد کی احتساب عدالت کے جج محمد بشیر نے عدالتی دائرہ اختیار نہ ہونے پر چار ریفرنسز نیب کو واپس کیے جن میں سابق صدر آصف زرداری کے خلاف ایک ریفرنس بھی شامل ہے۔
آصف زرداری کے وکیل فاروق ایچ نائیک نے دوران سماعت دلائل دیے کہ نیب قوانین میں ترمیم کے بعد یہ ریفرنسز عدالت کے دائرہ اختیار میں نہیں آتے لہٰذا احتساب عدالت ریفرنسز پر ٹرائل نہیں چلا سکتی۔
عدالت نے سابق صدر آصف زرداری ، فریال تالپور، حسین لوائی اور دیگر کے خلاف منی لانڈرنگ ریفرنس نیب کو واپس کردیا ہے۔
اس کے علاوہ منظور قادر اور دیگر ملزمان کے خلاف پلاٹ الاٹمنٹ ریفرنس، بلال شیخ اور دیگر کے خلاف سندھ بینک ریفرنس جب کہ جعلی بینک اکاؤنٹس کا پنک ریزیڈنسی ریفرنس بھی نیب کو واپس بھجوا دیا۔