سکھر میں آج صبح سی ٹی ڈی پولیس سے مقابلے میں ہلاک ملزم کی شناخت کامران بھٹی کے نام سے ہوئی ہے، جو کالعدم لشکر جھنگوی کا اہم اور سرکردہ رکن تھا۔
پولیس ذرائع کے مطابق سکھر میں شکارپور لنک روڈ پر سی ٹی ڈی پولیس کی ٹیم نے خفیہ اطلاع پر ناکہ بندی کر رکھی تھی کہ ملزم اپنے 2 ساتھیوں کے ہمراہ موٹر سائیکل پر جاتے ہوئے مبینہ مقابلے میں ہلاک ہوا۔
پولیس کے مطابق کامران بھٹی کے 2 ساتھی فرار ہوگئے، ملزم کے قبضے سے بارودی مواد اور اسلحہ بھی برآمد ہوا۔
پولیس ذرائع کے مطابق کامران بھٹی ایس ایس پی چوہدری اسلم کے گھر پر حملے کا مرکزی کردار تھا،وہ کراچی میں معروف قوال امجد صابری کے قتل، نیوی پر حملوں اور دیگر 20 ہائی پروفائل کیسز میں ملوث تھا۔
مقابلے کی تفتیش کیلئے کراچی سے ایس ایس پی سی ٹی ڈی عمر شاہد حامد کی ٹیم بھی ہمراہ سکھر پہنچ گئی۔