الیکشن کمیشن آف پاکستان نے سینیٹ انتخابات میں اسلام آباد کی نشست سے جیتنے والے اپوزیشن اتحاد کے امیدوار یوسف رضا گیلانی کی نااہلی کیس سے متعلق پاکستان تحریک انصاف (پی ٹی آئی) کی جلد سماعت کی درخواست منظور کرلی۔
فوری سماعت کی درخواست فرخ حبیب، کنول شوزب اور ملیکہ بخاری نے دائر کی تھی جس میں مؤقف اختیار کیا گیا ہے کہ یوسف رضا گیلانی چیئرمین سینیٹ کے امیدوار ہیں اور چیئرمین سینیٹ کا انتخاب 12 مارچ کو شیڈول ہے جبکہ الیکشن کمیشن نے 11 مارچ کو کیس مقرر کر رکھا ہے، پہلی بار ہوا کہ چیئرمین سینیٹ کا امیدوار انتخابی بدعنوانی کا مرتکب قرار پایا۔
درخواست میں استدعا کی گئی ہے کہ مناسب ہوگا وقت ضائع کیے بغیر کیس کی فوری سماعت کی جائے۔
الیکشن کمیشن نے یوسف رضا گیلانی کیس سے متعلق پی ٹی آئی کی درخواست منظور کرتے ہوئے کل سماعت کیلئے مقرر کردیا۔
خیال رہے کہ سابق وزیر اعظم یوسف رضا گیلانی کو اپوزیشن اتحاد پاکستان ڈیموکریٹک موومنٹ (پی ڈی ایم) نے باقاعدہ طور پر چیئرمین سینیٹ کے عہدے کیلئے امیدوار نامزد کردیا ہے۔