کورونا میں مبتلا بالی وڈ کے سینئر ادکار اور ادکارہ کرینہ کپور اور کرشمہ کپور کے والد رندھیر کپورکا کہنا ہے کہ ان کی حالت بہتر ہے اور وہ جلد گھر آجائیں گے۔
بھارتی میڈیا سے گفتگو کرتے ہوئے رندھیر کپور کا کہنا تھا کہ وہ ممبئی کے ایک اسپتال کے آئی سی یو میں چند روز گزارنے کے بعد اب ٹھیک ہو رہے ہیں۔
رندھیر کپور کے مطابق انھیں اسپتال میں قیام کے دوران آکسیجن کی ضرورت محسوس نہیں ہوئی، نہ ہی کبھی سانس کی تکلیف تھی، بس بخار تھا۔
خیال رہےکہ چند روز قبل 74 سالہ اداکار رندھیر کپور کا کورونا ٹیسٹ مثبت آیا تھا جس کے بعد اداکار رندھیر کپور کو آئی سی یو میں منتقل کر دیا گیا تھا تاہم کہا جا رہا تھا کہ ان کی طبیعت بہتر ہے۔
اسپتال انتظامیہ کا کہنا تھا کہ آئی سی یو میں سینئر اداکار کی نگرانی کی جا رہی ہے، ان کی حالت بہتر ہے تاہم انہیں مزید چند روز اسپتال میں رکھا جاسکتا ہے۔
واضح رہےکہ رندھیرکپور معروف بالی وڈ اداکار اور فلم ساز راج کپور کے بڑے بیٹے ہیں، ایک سال کے عرصے کے دوران ان کے دونوں بھائی رشی کپور اور راجیو کپور انتقال کرچکے ہیں۔