وفاقی وزیر اطلاعات فواد چوہدری کا کہنا ہے کہ پاکستان تحریک انصاف کے منحرف اراکین نے اپنی جماعت ہی نہیں ملک کی پیٹھ میں خنجر گھونپا۔
سوشل میڈیا پر جاری بیان میں وفاقی وزیر اطلاعات فواد چوہدری نے کہا کہ آرٹیکل 63 اے کے ریفرنس سے ہارس ٹریڈنگ، موقع پرستی اور کرپشن کے ڈرامےختم ہو سکیں گے۔
فواد چوہدری کا کہنا تھا کہ تحریک انصاف سے منحرف ارکان نے اپنی جماعت ہی نہیں ملک کی پیٹھ میں خنجر گھونپا۔
وفاقی وزیر کا کہنا تھا کہ منحرف ارکان کو سزا دینا اسی طرح اہم ہے جیسے ملک کے غداروں کو دی جاتی ہے۔
خیال رہے کہ وفاقی حکومت کی جانب سے آئین کے آرٹیکل 63 اے کی تشریح کے لیے سپریم کورٹ میں ریفرنس دائر کیا جا چکا ہے جس میں منحرف اراکین کے مستقبل سے متعلق رائے لی گئی ہے۔