پشاور: وزیراعلیٰ خیبرپختونخوا کےمعاون خصوصی برائے اطلاعات بیرسٹر سیف نے کہا ہےکہ دہشتگردی کی لہر ہم تو لے کر نہیں آئے بلکہ ہم نے بہت سے حملوں کو ناکام بنایا۔
برطانوی میڈیا سے گفتگو کرتے ہوئے بیرسٹر سیفر نے کہا کہ خیبرپختونخوا کی پولیس کے پاس تیاری اپنی جگہ پر پوری ہے اور دہشتگردی کی لہر ہم تو لے کر نہیں آئے، ہم بہت سے دہشتگرد حملوں کو پہلے ہی ناکام بنانے میں کامیاب ہوئے ہیں اور اگر حملے ہو رہے ہیں تو ہم ان کا بھرپور جواب بھی دے رہے ہیں،۔
بیرسٹرسیف نے کہا کہ ہم نے گزشتہ بجٹ میں سی ٹی ڈی اور پولیس کے لیے اربوں روپے مختص کیے جب کہ خیبرپختونخوا حکومت کو وفاق سے جو تعاون چاہیے وہ اسے نہیں مل رہا۔
ترجمان کے پی حکومت کا کہنا تھاکہ ریاستی سطح پر افغان حکومت سے کے پی حکومت نہیں وفاق بات کرسکتا ہے کیونکہ یہ بڑی سطح کا کام ہے، وفاق اس حکمتِ عملی کا حصہ ہے لیکن وہ تعاون نہیں کررہا۔