بھارتی ائیر لائن انڈیگو میں مسافروں کو دیے جانے والے سینڈوچ سے زندہ کیڑا نکل آیا جس کی ویڈیو سوشل میڈیا پر بھی وائرل ہو گئی۔
بھارتی میڈیا کے مطابق یہ واقعہ انڈیگو کی نئی دلی سے ممبئی کیلئے اڑان بھرنے والی فلائٹ میں پیش آیا۔
میڈیا رپورٹس کے مطابق دوران پرواز فلائٹ کی انتظامیہ کی جانب سے مسافروں کو کھانا دیا گیا جس میں موجود سبزیوں کے ایک سینڈوچ میں زندہ کیڑا پایا گیا۔
میڈیا رپورٹس میں بتایا گیا ہے کہ خشبو گپتا نامی ایک خاتون مسافر نے اپنے سینڈوچ سے زندہ کیڑا نکلنے کی شکایت کی لیکن انتظامیہ کی جانب سے کوئی خاص توجہ نہ دیے جانے پر خاتون نے اپنے کیمرے سے سینڈوچ میں موجود کیڑے کی ویڈیو بنائی اور ساتھ یہ بھی بتایا کہ انتظامیہ کو آگاہ کرنے کے باوجود بھی انہوں نے دیگر مسافروں کی صحت کو خطرے میں ڈالتے ہوئے کھانا تقسیم کیا۔
خشبو گپتا نے بتایا کہ جہاز کی انتظامیہ نے اس کے سینڈوچ کو کسی اور چیز سے تبدیل کرنے کا کہا اور ساتھ ہی انتظامیہ نے مجھے ایک چیزوں سے بھرا بیگ بھی دیا جسے میں نے لینے سے منع کردیا۔
میڈیا رپورٹس کے مطابق خشبو گپتا پیشے کے اعتبار سے پبلک ہیلتھ پروفیشنل ہے اور انہوں نے فلائٹ انتظامیہ کی لاپرواہی پر کیس درج کرنے کا اعلان بھی کیا ہے جبکہ ویڈیو سوشل میڈیا پر وائرل ہونے کے باوجود بھی فلائٹ انتظامیہ کی جانب سے کوئی ردعمل سامنے نہیں آیا۔