ضلع گھوٹکی کے کچے میں ڈاکوؤں کے ہاتھوں دو مغویوں کے قتل کے بعد لاشیں اٹھانے کے معاملے پر سندھ اور پنجاب کی پولیس میں حدود کا جھگڑا شروع ہو گیا۔
سندھ اور پنجاب پولیس جائے وقوعہ کو ایک دوسرے کی حدود قرار دے رہی ہیں۔
رحیم یار خان پولیس کا کہنا ہے کہ جہاں مغوی قتل ہوئے وہ ضلع گھوٹکی کے تھانہ رونتی کی حدود ہے جبکہ گھوٹکی پولیس کے مطابق جہاں ڈاکوؤں نے مغویوں کو قتل کیا وہ ضلع رحیم یار خان کے تھانہ ماچھکہ کی حدود ہے۔
رونتی کے ڈاکوؤں نے قید سے بھاگنے کی کوشش کرنے پر 2 مغویوں کو قتل کیا تھا، ڈاکوؤں کے ہاتھوں مغویوں میں فیصل آباد کا یاسین اور سرگودھا کا رہائشی اکرام شامل ہیں۔