سندھ حکومت نے صحافی نصراللہ گڈانی کے قتل کیس کے نامزد ملزم میرپور ماتھیلو کے ٹاؤن چیئرمین شہباز لوند کو معطل کر دیا۔
میرپور ماتھیلو کے صحافی نصراللہ گڈانی 25 مئی کو مسلح افراد کے حملے میں جاں بحق ہو گئے تھے، 27 جون کو عینی شاہدین نے پیپلزپارٹی کے مقامی ایم این اے خالد لوند اور ان کے دونوں بیٹوں ٹاؤن چیئرمین شہباز لوند اور نور محمد لوند کو قتل کا ملزم قرار دیا تھا۔
گزشتہ دو روز سے سندھ بھر کے صحافی کراچی میں سراپا احتجاج تھے، ان کا مطالبہ تھا کہ ایم این اے خالد لوند کی قومی اسمبلی کی رکنیت اور قتل کیس کے دوسرے ملزم ان کے صاحبزادے شہباز لوند کی ٹاؤن چیئرمین شپ معطل کی جائے۔
مقتول صحافی کی والدہ پٹھانی بی بی نے بھی وزیراعلیٰ سندھ مراد علی شاہ سے ملاقات کرکے اپنے بیٹے کے قاتلوں کی گرفتاری کا مطالبہ کیا تھا۔