08 اپریل ، 2018 
میرے بچے کا خاندانی نام ’مرزا ملک‘ ہوگا: ثانیہ مرزا
08 اپریل ، 2018
پاکستانی کرکٹ اسٹار شعیب ملک کی اہلیہ اور بھارتی ٹینس اسٹار ثانیہ مرزا کا کہنا ہے کہ ان کے بچے کا خاندانی نام ’مرزا ملک‘ ہوگا۔
بھارتی میڈیا رپورٹ کے مطابق گوا فیسٹ کے زیراہتمام تقریب میں 'صنفی تعصب' سے متعلق سیشن میں ثانیہ مرزا نے بطور مہمان خصوصی شرکت کی، اس موقع پر انہوں نے سماج کے صنفی امتیاز کے حوالے بات کی۔
ثانیہ مرزا نے کہا کہ ہم دو بہنیں ہیں ہمیں کبھی بھائی کی خواہش نہیں ہوئی اور ہمارے ہوتے ہوئے کبھی والدین کو بیٹے کی کمی محسوس نہیں ہوئی جب کہ اکثر رشتہ دار میرے والدین کو بیٹا پیدا کرنے کا کہتے تھے۔
ان کا کہنا تھا میں نے شادی کے بعد بھی اپنا خاندانی نام (surname) مرزا تبدیل نہیں کیا کیونکہ نام سے پہچان ہے اور یہ آگے بھی بڑھے گا۔
اس موقع پر ثانیہ مرزا سے پوچھا گیا کہ وہ اپنے بچے کا خاندانی نام کیا رکھیں گی تو انہوں نے جواب دیتے ہوئے کہا کہ ہمارے بچے کا خاندانی نام 'مرزا ملک' ہوگا۔
ان کا کہنا تھا کہ شعیب اور میں نے اس حوالے سے بات کی اور فیصلہ کیا کہ جب بھی ہمارا بچہ ہوگا اس کا خاندانی نام ’مرزا ملک ‘ ہوگا ناکہ صرف’ ملک‘ جب کہ میرے شوہر بیٹی کے خواہشمند ہیں۔
مزید خبریں :
سلیکشن کمیٹی کے بعد محمد یوسف کوچنگ سے بھی الگ ہوگئے
8 گھنٹے پہلے
