10 جون ، 2018 
سپریم کورٹ نے تنخواہیں نہ دینے والے میڈیا مالکان کو کل طلب کرلیا
10 جون ، 2018
لاہور: سپریم کورٹ نے تنخواہیں نہ دینے والے میڈیا مالکان کو کل طلب کرلیا۔
سپریم کورٹ لاہور رجسٹری میں چیف جسٹس پاکستان کی سربراہی میں دو رکنی بینچ نے صحافیوں کو تنخواہوں کی عدم ادائیگی کیخلاف کیس کی سماعت کی۔
سماعت کے دوران عدالتی حکم کے باوجود تنخواہیں نہ دینے پر چیف جسٹس نے اظہار برہمی کرتے ہوئے تنخواہیں نہ دینے والے میڈیا مالکان کو کل طلب کرلیا جب کہ سیکریٹری اطلاعات کو بھی پیش ہونے کا حکم دیا۔
اس موقع پر چیف جسٹس کا کہنا تھا کہ میڈیا مالکان ذاتی حیثیت میں پیش ہو کر وضاحت کریں۔
سپریم کورٹ نے میڈیا اداروں سے نکالے گئے صحافیوں کی برطرفیاں بھی معطل کردیں ہیں جب کہ کیس کی سماعت کے دوران صدر الیکٹرانک میڈیا رپورٹرز ایسوسی ایشن آصف بٹ بھی عدالت میں پیش ہوئے۔
یاد رہے کہ چیف جسٹس آف پاکستان نے ملازمین کو تنخواہوں کی ادائیگی نہ کرنے والے میڈیا اداروں کو 30 اپریل تک تنخواہیں دینے کا حکم جاری کیا تھا۔
