19 جولائی ، 2018 
بھارتی اداکارہ ملائکہ اروڑہ کا عین موقع پر فیشن شو میں شرکت سے انکار
19 جولائی ، 2018
بالی وڈ کی آئٹم گرل’ ملائکہ اروڑہ نے وعدے کے مطابق معاوضہ نہ دینے پر آسٹریلیا میں ہونے والے فیشن شو میں شرکت سے انکار کردیا۔
ملائکہ اروڑہ نے صرف چند ایک ہی فلموں میں ادکاری کے جوہر دکھائے ہیں اور بالی وڈ میں ان کی شہرت ان کے ڈانس کے باعث ہے۔
ملائکہ نے بطور ڈانسر کیریئر کی شروعات شاہ رخ خان کی فلم ’دل سے‘ کے آئٹم سانگ ’چھیاں چھیاں‘ سے کیا لیکن فلم ’دبنگ‘ کے آئٹم گیت ’منی بدنام ہوئی‘ نے انہیں راتوں رات شہرت کی بلندیوں پر پہنچا دیا تھا ۔
ملائکہ ان دنوں کسی بھی فلم یا رئیلٹی شو میں کام نہیں کررہی ہیں لیکن اس کے باوجود انہوں نے آسٹریلیا میں ہونے والے شو میں شرکت سے انکار کردیا ہے۔
میڈیا رپورٹس کے مطابق ملائکہ کو آسٹریلیا کے شہر وکٹوریا میں ایک فیشن شو میں پرفارم کرنا تھا اور شو کی تمام کیٹیگریز کی ٹکٹیں بھی فروخت ہوچکی تھیں لیکن آئٹم گرل نے منتظمین کے رویے سے دلبرداشتہ ہوتے ہوئے شرکت سے منع کردیا۔
بھارتی میڈیا رپورٹ کے مطابق ملائکہ اروڑہ سے منتظمین نے روانگی سے پہلے معاوضہ دینے کا وعدہ کیا تھا لیکن روانگی کے روز تک منتظمین نے معاوضہ نہیں دیا جس پر اداکارہ نے فیشن شو میں جانے سے انکار کیا۔
دوسری جانب شو کے منتظمین نے تقریب ملتوی کرنے کی وجہ ملائکہ کے انکار کے بجائے تکنیکی مسائل کو قرار دیا ہے۔
واضح رہے کہ ملائکہ اروڑہ سلمان خان کے بھائی ارباز خان سے طلاق لے چکی ہیں لیکن اس کے باوجود وہ خان خاندان کی تقریبات میں شریک ہوتی ہیں۔
مزید خبریں :
سوناکشی کو کس اداکار نے بڑی عمر کا کہہ کر فلم سے نکلوایا تھا؟
20 دسمبر ، 2024
