ملکی تاریخ میں پہلی مرتبہ خواجہ سرا کا بینک اکاؤنٹ کھل گیا

پاکستان کی تاریخ میں پہلی مرتبہ کسی خواجہ سرا کا بینک اکاؤنٹ کھل گیا۔

ترجمان فرسٹ وومن بینک کے مطابق منظور نامی خواجہ سرا کا اکاؤنٹ بینک کی ملتان برانچ میں کھولا گیا ہے۔

ترجمان نے بتایا کہ خواجہ سرا منظور نے ’زندگی آسان‘ اکاؤنٹ کھولا ہے جبکہ فرسٹ وومن بینک کی مزید برانچیں بھی خواہش مند خواجہ سراؤں کے اکاؤنٹ کھولیں گی۔

جیو نیوز سے گفت گو کرتے ہوئے خواجہ سرا منظور نے کہا کہ ہم لوگوں کا اپنے پیسے حفاظت سے رکھنا ایک بہت بڑا مسئلہ تھا، ہم اپنی جمع پونجی گنوا چکے ہیں، اپنے ساتھ رقم رکھنا ممکن نہیں ہوتا اور ہم اپنے پیسے اپنی کوٹری میں چھوڑنے پر مجبور تھے۔

انہوں نے کہا کہ میں نے فرسٹ وومن بینک آکر بات کی تو یہ انہوں نے کرم کیا اور مجھے اکاؤنٹ کھولنے کی اجازت دی۔

منظور نے کہا کہ میں نے ایک ہزار روپے سے اپنا بنک اکاؤنٹ کھولا ہے، یہ ایک بہت اچھا تجربہ ہے اور میں آج بہت خوش اور مطمئن ہوں۔

انہوں نے کہا کہ میں پیسے جمع کرنے کے لیے اب یہ اکاونٹ استعمال کروں گی اور دوسرے ساتھیوں کو بھی اکاؤنٹ کھولنے کا کہوں گی تاکہ پیسے محفوظ رہیں اور ہم بھی دوسروں کی طرح محفوظ طریقے سے بچت کر سکیں۔