سانحہ اے پی ایس میں زخمی ہونیوالے طالبعلم کا بین الاقوامی جی سی ایس ای امتحانات میں اعزاز

پاکستانی طالبعلم احمد نواز  نے بین الاقوامی جنرل سرٹیفکیٹ آف سیکنڈری ایجوکیشن (جی سی ایس ای) امتحانات میں 6 اے پلس اور 2 ایز لے کر منفرد اعزاز حاصل کرلیا۔

واضح رہے کہ احمد نواز 16 دسمبر 2014 کو پشاور کے آرمی پبلک اسکول پر ہونے والے دہشت گردوں کے حملے میں زخمی ہوگئے تھے، اس سانحے میں 150 کے قریب افراد شہید ہوئے تھے، جن میں زیادہ تعداد معصوم طالب علموں کی تھی۔

احمد نواز نے ٹوئٹر پر  اپنی کامیابی کا اعلان کیا اور بتایا کہ اس میں سب سے بڑا ہاتھ ان کے والدین کا ہے۔

ان کا مزید کہنا تھا کہ یہ ان کے لیے بہت بڑی کامیابی ہے، جس نے انہیں آکسفورڈ یونیورسٹی میں داخلے سے قریب کردیا ہے۔

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے بھی اپنے ٹوئٹر پیغام میں 17 سالہ طالبعلم کو امتحانات میں کامیابی پر مبارکباد دیتے ہوئے کہا کہ 'احمد نواز کی تعلیمی میدان میں کامیابی پر پاکستان کو فخر ہے'۔

ڈی جی آئی ایس پی آر کا کہنا تھا کہ 'احمد نواز نے اپنے عزم، ہمت اور تعلیم کی طاقت سے شیطانی قوتوں کو شکست دی'۔

میجر جنرل آصف غفور نے اپنے پیغام میں احمد نواز کے لیے نیک خواہشات کا بھی اظہار کیا۔