کھیل

کیا شاہین آفریدی نیوزی لینڈ کے خلاف ٹیسٹ ڈیبیو کریں گے؟

13 نومبر ، 2018

جمعے سے شروع ہونے والے پہلے ٹیسٹ میں شاہین کی شرکت کا کوئی امکان نہیں ہے، ذرائع۔ فوٹو: فائل

نیوزی لینڈ کے خلاف ون ڈے سیریز کے تین میچوں میں 9 وکٹیں لینے والے لیفٹ آرم فاسٹ بولر شاہین شاہ آفریدی کو ٹیسٹ ٹیم کے 15 ممکنہ کھلاڑیوں میں شامل کیا گیا ہے لیکن ابوظہبی کے شیخ زائد اسٹیڈیم میں جمعے سے شروع ہونے والے پہلے ٹیسٹ میں ان کی شرکت کا کوئی امکان نہیں ہے۔

اسی طرح نوجوان بیٹسمین سعد علی بھی گیارہ رکنی ٹیم میں شامل نہیں ہوں گے۔

ذرائع کا کہنا ہے کہ پہلے ٹیسٹ میں پاکستانی ٹیم چھ بیٹسمینوں، دو فاسٹ بولرز اور دو اسپنرز کے ساتھ میدان میں اترے گی جبکہ پاکستان ٹیم کی قیادت وکٹ کیپر بیٹسمین سرفراز احمد کریں گے۔

سرفراز احمد کے پاس آف اسپنر محمد حفیظ اور لیفٹ آرم اسپنر حارث سہیل کا اسپین بولنگ آپشن بھی موجود ہو گا۔

ذرائع کا کہنا ہے کہ پاکستانی اننگز کا آغاز محمد حفیظ اور امام الحق کریں گے۔

اظہر علی ون ڈاون پر آئیں گے جبکہ بائیں ہاتھ کے بیٹسمین حارث سہیل چوتھے نمبر پر کھیلیں گے۔

اسد شفیق پانچویں اور بابر اعظم چھٹے نمبر پر کھیلیں گے۔ ساتواں نمبر کپتان سرفراز احمد کا ہو گا۔

اسپین بولنگ میں پاکستان کے ٹرمپ کارڈ یاسر شاہ ہوں گے جب کہ دوسرے اسپنر آف اسپنر بلال آصف ہوں گے۔

فاسٹ بولنگ میں محمد عباس نمایاں ہیں جنہوں نے آسٹریلیا کے خلاف سیریز میں 17 وکٹ لے کر مین آف دی سیریز ایوارڈ حاصل کیا تھا۔

دوسرے فاسٹ بولر ممکنہ طور پر حسن علی ہوں گے۔ فاسٹ بولنگ میں حسن علی اور میر حمزہ میں مقابلہ ہے لیکن امکان ہے کہ ہے حسن علی کو خراب بولنگ فارم کے باوجود میر حمزہ پر ترجیح دی جائے گی۔