30 نومبر ، 2018 
ملک کے سات بڑے شہروں میں گٹر کے پانی میں پولیو وائرس کی تصدیق
30 نومبر ، 2018
اسلام آباد، کراچی اور لاہور سمیت ملک کے سات بڑے شہروں میں سیوریج کے پانی میں پولیو وائرس کا انکشاف ہوا ہے۔
پاکستان انسداد پولیو پروگرام نے اپنی تازہ ترین رپورٹ میں ملک کے 7 بڑے شہروں کے گٹر کے پانی میں پولیو وائرس کا انکشاف کیا ہے۔
انسداد پولیو پروگرام کے مطابق کراچی، اسلام آباد، سکھر، لاہور، راولپنڈی، مردان اور پشاور میں سیوریج کے پانی میں پولیو وائرس پایا گیا۔
یہ رپورٹ ملک بھر سے حاصل کیے گئے سیوریج کے پانی کے نمونوں کے تجزیوں سے تیار کی گئی ہے۔
قومی انسداد پولیو پروگرام کے حکام کا کہنا ہے کہ والدین کی آگاہی کے لیے پولیو وائرس کی تفصیلات جاری کی جا رہی ہیں۔
سیوریج کے پانی میں پولیو وائرس کی تصدیق ہونا انتہائی خطرناک ہے، یہ اس بات کی نشاندہی کرتا ہے کہ بچوں کی بڑی تعداد پولیو سے بچاؤ کے قطروں سے محروم ہے اور ان کے پولیو سے متاثر ہونے کا خدشہ ہے۔
انسداد پولیو پولیو پروگرام نے اپیل کی ہے کہ والدین 10 سے 13 دسمبر کو شروع ہونے والی ملک گیر انسداد پولیو مہم کامیاب بنائیں، اور اپنے پانچ سال سے کم عمر بچوں کو پولیو سے بچاؤ کی ویکسین ضرور پلوائیں۔
