وزیراعظم کا گورنر ہاؤس لاہور کی دیواریں گرانے کا حکم

وزیر اطلاعات پنجاب فیاض الحسن چوہان کا کہنا ہے کہ وزیراعظم عمران خان نے گورنر ہاؤس پنجاب کی دیواریں گرانے کا حکم دے دیا ہے۔

صوبائی وزیر اطلاعات کا فیاض الحسن چوہان کا ایوان وزیر اعلی کے باہر میڈیا سے گفتگو کرتے ہوئے کہنا تھا کہ وزیراعظم عمران خان نے آج لاہور کا ایک روزہ دورہ کیا۔

ان کا کہنا تھا کہ وزیراعظم عمران خان نے اپنے دورے کے دوران پنجاب حکومت کی کارکردگی کا جائزہ لیا اور وزیراعظم نے پنجاب حکومت کی کارکردگی پر اطمینان کا اظہار کیا ہے۔

انہوں نے کہا کہ سی ایم سیکرٹریٹ کا خرچہ پہلے 55 لاکھ روپے ماہانہ تھا جو اب کم ہو کر 8 لاکھ روپے ہو چکا ہے۔

فیاض الحسن چوہان نے کہا گورنر ہاؤس کوئی تاریخی جگہ نہیں، ایک آفس ہے اور وزیراعظم عمران خان نے گورنر ہاؤس کی دیواریں گرانے کا حکم دے دیا ہے۔

فیاض الحسن چوہان نے کہا کہ 48 سے 72 گھنٹے میں گورنر ہاؤس کی دیواریں گرانے کے فیصلے پر عملدرآمد شروع ہو گا۔

ان کا کہنا تھا کہ وزیراعظم نے ٹرانسفر پوسٹنگ پر تحفظات کا اظہار کرتے ہوئے کہا واضح کیا کہ ٹرانسفر پوسٹنگ میں کسی وزیر کا نام نہیں آنا چاہیے۔

انہوں نے کہا کہ پرائس کنٹرول کمیٹیاں پہلے خالصتاً سیاسی بنیادوں پر بنائی جاتی تھیں، نئی پرائس کنٹرول کمیٹیاں بہتر کام کریں گی۔

گورنرہاؤس کی کسی بھی عمارت کو گرایا نہیں جارہا، شفقت محمود

اس حوالے سے چیئرمین قومی ورثہ کمیشن شفقت محمود نے کہا ہے کہ گورنرہاؤس کی کسی بھی عمارت کو گرایا نہیں جارہا۔

انہوں نے کہا کہ گورنر ہاؤس لاہور کی چاردیواری کی جگہ خوبصورت آہنی جنگلا لگایا جائے گا، آہنی جنگلے کی تنصیب سے گورنرہاؤس کی عمارت میں مزید کشش پیدا ہوگی۔

شفقت محمود نے کہا کہ گورنرہاؤس میں آرٹ گیلری، میوزیم اور نباتاتی گارڈن بھی بنایا جائے گا۔