کراچی میں پی ایس پی کے دفتر پر فائرنگ سے دو افراد جاں بحق
23 دسمبر ، 2018
کراچی: گلبہار عثمانیہ سوسائٹی میں پاک سرزمین پارٹی کے دفتر پر فائرنگ کے نتیجے میں دو افراد جاں بحق اور دو زخمی ہو گئے۔
پولیس کے مطابق کراچی کے علاقے گلبہار عثمانیہ سوسائٹی میں پاک سرزمین پارٹی کے دفتر پر فائرنگ کی گئی جس کے نتیجے میں 4 افراد زخمی ہوئے۔
زخمیوں کو طبی امداد کیلئے اسپتال پہنچایا گیا جہاں زخموں کی تاب نہ لاتے ہوئے دو افراد دم توڑ گئے۔
فائرنگ کے واقعے میں جاں بحق ہونے والے افراد کی شناخت اظہر اور فہد کے ناموں سے ہوئی ہے۔
پولیس حکام کا کہنا ہے کہ جائے وقوعہ سے نائن ایم ایم کے 11 خول ملے ہیں، خول تحویل میں لے کر تحقیقات شروع کر دی ہیں۔
