کراچی میں بلی کی ہلاکت پر مقدمہ
08 فروری ، 2019
کراچی میں گاڑی کی زد میں آکر پالتو بلی کی ہلاکت کے خلاف شہری کی درخواست پر عدالت نے ایک خاتون کے خلاف مقدمہ درج کرنے کا حکم دیا ہے۔
کراچی کےعلاقے ڈیفنس میں ایک شہری کی پالتو بلی ایک خاتون کی گاڑی کے نیچے آکر ہلاک ہوگئی جس کے بعد شہری نے سٹی کورٹ میں درخواست دائر کر دی۔
درخواست میں شہری کا کہنا تھا کہ واقعہ ڈیفنس فیز 8 درخشاں تھانے کی حدود میں یکم فروری کو پیش آیا۔
درخواست میں کہا گیا ہےکہ دنیا بھر میں بے زبان جانوروں کے حقوق کا تحفظ کیا جاتا ہے، یہاں کی پولیس اور عدالت بھی جانوروں کےتحفظ کے لیے اقدامات کریں۔
سٹی کورٹ نے بلی کی موت کی ذمہ دار خاتون کے خلاف مقدمہ درج کرنے کا حکم دے دیا ہے۔
