30 مئی ، 2019 
کفایت شعاری مہم: قومی اسمبلی سیکریٹریٹ نے 63 کروڑ روپے کی بچت کرلی
30 مئی ، 2019
قومی اسمبلی سیکریٹریٹ نے کفایت شعاری مہم کے ذریعے اخراجات میں موجودہ مالی سال کے دوران 63 کروڑ روپے سے زائد بچا لئے ، یہ رقم تحائف، خاطر مدرات اور سفری اخراجات کی مد میں بچائی گئی۔
اسپیکر قومی اسمبلی اسد قیصر کی ہدایت پر کفایت شعاری مہم پر عمل درآمد کرتے ہوئے قومی اسمبلی سیکریٹریٹ نے اخراجات میں موجودہ مالی سال کے دوران 63 کروڑ روپے سے زائد بچالیے۔
قومی اسمبلی سیکرٹریٹ نےبچت مہم سے وزارت خزانہ کو آگاہ کردیا۔ قومی اسمبلی سیکریٹریٹ اعلامیہ کے مطابق اسمبلی کے کل بجٹ کا 18 فیصد کفایت شعاری مہم سے بچایا گیا۔
رقم تحائف، خاطر مدرات اور سفری اخراجات کی مد میں بچائی گئی۔ ارکان پارلیمنٹ کے اندرون و بیرون ملک دورں میں کمی سے بھی بچت ہوئی۔
اسپیکر قومی اسمبلی اسد قیصر نے کہا کہ موجودہ حکومت ملک کو معاشی بحران سے نکالے گی، ہمیں انفرادی سطح پر بہتری کی کوشش کرنی ہوگی، پاکستان اس وقت مشکل دور سے گزر رہا ہے، ملکی ترقی کیلئے سب کو اپنا کرداد ادا کرنا ہو گا۔
