دی ڈونکی کنگ کوریا والوں کا دل جیتنے کیلئے تیار

باکس آفس پر سب سے زیادہ بزنس کرنے والی پہلی پاکستانی سپر ہیرو اینی میٹڈ فلم 'دی ڈونکی کنگ' 28 اگست کو جنوبی کوریا میں ریلیز ہو گی۔

'دی ڈونکی کنگ' کو عالمی سطح پر مقامی زبانوں میں ڈب کرکے سینما گھروں میں پیش کیاجائے گا۔

اس سلسلے کے پہلے مرحلے میں فلم جنوبی کورین زبان میں وہاں کے سنیما گھروں میں 28 اگست کو نمائش کے لیے پیش کی جائے گی۔

یہ پہلی پاکستانی انیمیٹڈ فلم ہوگی جو جنوبی کوریا میں بڑے پیمانے پر سینماؤں میں نمائش کےلئےپیش کی جائے گی۔

ڈونکی کنگ کے ڈائریکٹر عزیز جندانی نے کہا ہے کہ "بحیثیت قوم ہمارے لیے یہ ایک بہت بڑا کارنامہ ہے کہ ایک پاکستانی فلم اتنی اونچی سطح پر پہنچ چکی ہے۔'

’دی ڈونکی کنگ‘ کی کہانی 

’دی ڈونکی کنگ‘ کی کہانی بہت ہی دلچسپ ہے، جس کے مطابق 'آزاد نگر' کے بادشاہ (شیر) کی ریٹائرمنٹ کا وقت قریب ہے اور وہ اپنی بادشاہت کسی اور کے حوالے کرنا چاہتے ہیں۔

مختلف جانور خود کو اس عہدے کا اہل ثابت کرنے کی کوشش کرتے ہیں لیکن ایسے میں چالاک لومڑی کو منگو دھوبی (گدھے) کا خیال آتا ہے اور وہ اس کا نام پیش کردیتی ہے۔

منگو یہ سن کر تھوڑا گھبراتا ہے اور کہتا ہے کہ 'یہ مجھ سے نہیں ہوگا، میں گدھا ہی ٹھیک ہوں'، لیکن پھر وہ اس کے لیے تیار ہوجاتا ہے اور لومڑی سے کہتا ہے، 'میں سلطنت کا بوجھ اٹھانے کے لیے تیار ہوں لیکن وزن 30 کلو سے زیادہ نہیں ہونا چاہیے'۔

فلم میں موسیقی کا تڑکا بھی شامل ہے، جہاں منگو کنگ 'ڈونکی راجہ۔۔۔ اب بجے گا سب کا باجا' پر ڈانس کرتا نظر آتا ہے جبکہ 'اِنکی پنکی پونکی' نے بھی سننے والوں کو خوب متاثر کیا۔

فلم میں افضل خان عرف جان ریمبو نے منگو جب کہ حنا دلپذیر نے لومڑی کی صداکاری کی ہے۔

دیگر صداکاروں میں جاوید شیخ، عدیل ہاشمی، شفاعت علی، غلام محی الدین، فیصل قریشی، شبیر جان، مانی، اسماعیل تارا اور عرفان کھوسٹ شامل ہیں۔