25 ستمبر ، 2019 
بھارتی پروموٹرز کو راحت فتح علی کے ساتھ کام کرنے سے روک دیا گیا
25 ستمبر ، 2019
بھارتی سنیما ایسوسی ایشن کی جانب سے پروموٹرز کو عالمی شہرت یافتہ پاکستانی گلوکار راحت فتح علی کے ساتھ شو منسوخ کرنے کا نوٹس جاری کیا گیا ہے۔
پاکستانی گلوکار راحت فتح علی خان اپنی آواز کی وجہ سے پوری دنیا میں جانے جاتے ہیں، دنیا بھر سے لوگ ان کے شو اور کانسرٹ میں شرکت کرنے کے لیے دور دور سے آتے ہیں۔
گزشتہ ماہ بھارتی حکومت نے آئین میں مقبوضہ کشمیر کی خصوصی حیثیت ختم کرکے وہاں سے آرٹیکل 370 اور 35 اے منسوخ کرکے ریاست کو دو حصوں میں تقسیم کردیا ہے، اس تمام صورتحال کے بعد دونوں ممالک کی جانب سے مواد نشر کرنے اور اداروں کے ساتھ کام کرنے پر پابندی عائد کردی گئی۔
دی فیڈریشن آف ویسٹرن انڈیا سائن امپلوائس نے بھارتی پروموٹرز کارل کلرا اور نرمل دھلی ول کو معروف گلوکار راحت فتح علی خان کے ساتھ کانسرٹ منسوخ کرنے کا نوٹس جاری کیا جو کہ کینیڈا اور امریکا میں 4 اور 20 اکتوبر کو ہونا تھا۔
بھارتی فیڈریشن نے انتباہی خط میں یہ بات واضح کی کہ ہمیں پوسٹرز موصول ہوئے ہیں جس میں بھارتی پروموٹر پاکستانی گلوکار کے ساتھ ہونے والے کانسرٹ کی تشہیر کررہے ہیں جب کہ ہم نے بھارتی گلوکار، اداکار، میزبان کو پہلے ہی منع کیا ہوا تھا کہ وہ کسی پاکستانی آرٹسٹ کے ساتھ کام نہیں کریں گے۔
خط میں مزید لکھا گیا کہ ملک کی عزت اور وقار کو برقرار رکھنے کے لئے مذکورہ شو کو فوری طور پر منسوخ کریں۔
واضح رہے کہ گزشتہ دنوں بھارتی فیڈریشن نے گلوکار میکا سنگھ پر پاکستان جانے کی وجہ سے پابندی عائد کی تھی۔
مزید خبریں :
میرے نزدیک دوستی ضروری، شادی بیکار کام ہے: جاوید اختر
25 نومبر ، 2024
اہلیہ ایشوریا کیلئے ابھیشیک کے بیان نے مداحوں کو حیران کردیا
25 نومبر ، 2024
