اسلام آباد: نجی یونیورسٹی کی طالبہ مبینہ طور پر سیلفی لیتے ہوئے چھت سے گرکر ہلاک

اسلام آباد: نجی یونیورسٹی کی طالبہ مبینہ طور پر سیلفی لیتے ہوئے چھت سے گر کر جاں بحق ہوگئی۔

یونیورسٹی حکام کے مطابق بی ایس کی حلیمہ نامی طالبہ یونیورسٹی کے نو تعمیرشدہ بلاک کے چوتھے فلور سے سیلفی لیتے ہوئے نیچے گری جس کے باعث وہ شدید زخمی ہوگئی، حلیمہ کو کمر میں شدید چوٹ آنے کے باعث اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گئی۔

ذرائع کے مطابق طالبہ کی ہلاکت یونیورسٹی کے نو تعمیرشدہ بلاک سے گر کر ہوئی جہاں طلباء کو جانے کی اجازت نہیں دی گئی تھی۔

ادھر حلیمہ کے ساتھی طلباء نے طالبہ کی ہلاکت پر یونیورسٹی حکام کے خلاف احتجاج کرکے اسلام آباد کا شاہین چوک بلاک کردیا۔

ساتھی طلباء نے یونیورسٹی حکام پر الزام عائد کیا ہے کہ وہ حلیمہ کی ہلاکت کے اصل حقائق چھپا ر ہے ہیں۔  

طلباء کا کہنا ہے کہ چوتھے فلور پر اکاؤنٹنگ اور فنانس کی کلاسز بھی ہوتی تھیں اس فلور پر لفٹ کی جگہ خالی چھوڑ دینے کے باعث حادثہ پیش آیا ہے۔