طیارہ ایرانی میزائل لگنے سے تباہ ہوا: کینیڈین وزیراعظم
10 جنوری ، 2020
کینیڈا کے وزیراعظم جسٹن ٹروڈو کا کہنا ہے انٹیلی جنس رپورٹ کے مطابق ایران میں تباہ ہونے والے یوکرین کے طیارے کو میزائل سے نشانہ بنایا گیا۔
چند روز قبل ایران میں یوکرین کا مسافر طیارہ تباہ ہو گیا تھا جس میں 63 کینیڈین شہریوں سمیت 176 افراد سوار تھے جو سب کے سب ہلاک ہو گئے تھے۔
یوکرین کی جانب سے طیارہ حادثے کی وجہ پہلے انجن میں لگنے والی آگ کو قرار دیا گیا لیکن بعدازاں یوکرین نے انجن کی خرابی کی وجہ کا لفظ ہٹا دیا جس کے باعث بین الاقوامی میڈیا پر کئی سوالات ہونے لگے۔
امریکا نے تو طیارے کو حادثہ ماننے سے انکار کرتے ہوئے الزام عائد کیا تھا کہ مسافر طیارہ ایرانی میزائل لگنے سے تباہ ہوا لیکن اب کینیڈی وزیراعظم جسٹن ٹروڈو نے بھی حملے کی ذمہ داری ایران پر عائد کر دی ہے۔
جسٹن ٹروڈو کا کہنا ہے انٹیلی جنس رپورٹ کے مطابق یوکرین کا مسافر طیارہ حادثے کا شکار نہیں ہوا بلکہ اسے ایرانی میزائل نے نشانہ بنایا۔
کینڈین وزیراعظم کا کہنا ہے کہ طیارہ حادثے کی مکمل اور شفاف تحقیقات تک چین سے نہیں بیٹھیں گے۔
ایران میں تباہ ہونے والے مسافر طیارے کی ایک ویڈیو بھی منظر عام پر آئی ہے جس میں دیکھا جا سکتا ہے حادثے سے قبل کوئی آتشی چیز طیارے سے ٹکرائی اور پھر طیارہ کچھ دیر ہوا میں رہنے کے بعد زمین پر گر کر تباہ ہو گیا۔
دوسری جانب ایران کی سول ایوی ایشن کے سربراہ علی عابدزادہ نے امریکا اور کینیڈا کے الزامات کو مسترد کرتے ہوئے کہا ہے کہ اگر ان کے پاس کوئی شواہد ہیں تو پیش کریں۔
