علی بابا کے بانی کا پاکستان سمیت دیگر ممالک کو 18 لاکھ ماسک دینے کا اعلان
21 مارچ ، 2020
معروف آن لائن کمپنی علی بابا کے بانی جیک ما نے پاکستان سمیت ایشیائی ممالک کو کورونا وائرس سے نمٹنے کے لیے ماسک اور آلات فراہم کرنے کا اعلان کردیا۔
آن لائن کمپنی کے مالک و چینی بزنس مین جیک ما نے پڑوسی ممالک کو کورونا وائرس سے نمٹنے کے لیے آلات فوری طور پر فراہم کرنے کا اعلان کیا۔
جیک ما کا اپنی ٹوئٹ میں کہنا تھا کہ وہ فوری طور پر 18 لاکھ ماسک، 2 لاکھ 10 ہزار ٹیسٹ کٹس، 36 ہزار حفاظتی سوٹ کے ساتھ ساتھ وینٹی لیٹرز اور تھرما میٹرز فراہم کریں گے۔
انہوں نے مزید کہا کہ یہ ہنگامی امداد پاکستان، افغانستان، بنگلادیش، کمبوڈیا، مالدیپ، منگولیا، نیپال سمیت دیگر ممالک کیلئے ہے۔
جیک ما کے مطابق یہ تمام سامان فوری پہنچانا ممکن نہیں لیکن وہ پھر بھی بروقت پہنچانے کی پوری کوشش کریں گے۔
خیال رہے کہ اس سے قبل جیک ما فاؤنڈیشن امریکا کو بھی کورونا وائرس کی تشخیص کے لیے ایک لاکھ کٹس فراہم کرچکی ہے جبکہ اس کے علاوہ یورپی ممالک میں بھی کورونا وائرس سے نمٹنے کا سامان عطیہ کیا گیا ہے۔
واضح رہے کہ چین کورونا وائرس کے خلاف جنگ جیتنے کے قریب ہے اور کورونا وائرس کے کیسز میں تیزی سے کمی آئی ہے جبکہ یورپ میں مہلک وائرس نے تباہی مچا دی ہے اور ہزاروں افراد لقمہ اجل ہوگئے ہیں۔
