29 مارچ ، 2020 
کورونا کو سنجیدہ نہ لینے والے خود اپنے دشمن ہیں: گورنر پنجاب
29 مارچ ، 2020
کورونا وائرس سے بچاؤ کے لیے ملک کے دیگر صوبوں کی طرح پنجاب حکومت نے بھی سخت لاک ڈاؤن کر رکھا ہے لیکن اس کے باوجود شہری لاک ڈاؤن کی خلاف ورزی کر رہے ہیں۔
اس حوالے سے گورنر پنجاب چوہدری محمد سرور نے اپنے ایک بیان میں کہا کہ کورونا کو سنجیدہ نہ لینے والے اپنے آپ کے بھی دشمن ہیں، گھروں سے باہر نکلنا کورونا کو خود دعوت دینے کے مترادف ہے۔
انہوں نے کہا کہ سماجی رابطوں میں فاصلے رکھنے سے کورونا کو روکا جا سکتا ہے اس لیے عوام کو گھروں تک محدود رکھنے کے لیے ہر اقدام اٹھایا جائے گا۔
واضح رہے کہ پاکستان میں کورونا وائرس سے اب تک مجموعی طور پر 15 افراد جاں بحق ہو چکے ہیں جب کہ ملک بھر میں کیسز کی تعداد 1540 سے زائد ہوگئی ہے۔ پنجاب سے اب تک کورونا کے 570 کیسز سامنے آ چکے ہیں۔
