01 اپریل ، 2020 
کورونا فنڈ: جوز بٹلر کا ورلڈکپ 2019 کے فائنل کی شرٹ نیلام کرنے کا اعلان
01 اپریل ، 2020
کورونا کے خلاف جنگ میں فنڈ جمع کرنے کے لیے انگلینڈ کے وکٹ کیپر بیٹسمین جوز بٹلر نے ورلڈکپ 2019 کے فائنل میں پہننے والی شرٹ کو نیلام کرنے کا اعلان کردیا۔
انگلش کرکٹر جوز بٹلر نے ٹوئٹر پر جاری ویڈیو پیغام میں کہا جیسا کہ سب کو معلوم ہے کہ اسپتال، ڈاکٹرز، طبی عملہ اور نیشنل ہیلتھے سروس اسٹاف کورونا وائرس کا مقابلہ کرنے لیے ناقابل یقین خدمات انجام دے رہے ہیں، ایسے میں انہیں بھی آنے والے ہفتوں اور مہینوں میں ہماری ضرورت ہوگی۔
انگلش کھلاڑی نے کہا کہ گزشتہ ہفتے رائل برومپٹن اور ہیئرفیلڈ اسپتال کی جانب سے کووڈ-19 کے مریضوں کی زندگی بچانے کے لیے طبی آلات کے لیے ایمرجنسی اپیل کی تھی ،ایسے میں ان کی مدد کے لیے میں فنڈ جمع کرنے میں اپنا حصہ ڈالتے ہوئے ورلڈکپ فائنل کی شرٹ عطیہ کرنے جارہا ہوں جس پر ورلڈکپ اسکواڈ کے تمام کھلاڑیوں کے دستخط ہوں گے۔
انہوں نے کہا کہ شرٹ نیلام ہونے کے بعد اس کی جو بھی رقم ہوگی وہ مذکورہ اسپتالوں کو عطیہ کی جائے گی تاہم معلومات حاصل کرنے کے لیے بائیو میں دیے گئے لنک پر کلک کریں۔
بعدازاں انگلینڈ کرکٹ بورڈ نے بھی اس حوالے سے کرکٹر کی ٹوئٹ شیئر کی۔
واضح رہے کہ برطانیہ میں کورونا وائرس سے اب تک 25 ہزار سے زائد افراد متاثر ہوچکے ہیں جب کہ 1700 سے زائد ہلاکتیں ہیں۔
مزید خبریں :
اظہر علی کو پی سی بی میں اہم عہدہ مل گیا
22 نومبر ، 2024
مجھے میڈیم پیسر کیوں بولا؟ بمراہ رپورٹر کے سوال پر برا مان گئے
21 نومبر ، 2024
