03 اگست ، 2020
شوبز انڈسٹری سے کنارہ کشی اختیار کرنے والی جوڑی حمزہ علی عباسی اور نیمل خاور عباسی کے ہاں بیٹے کی پیدائش ہوئی ہے۔
حمزہ علی عباسی نے اپنے گھر آئے ننھے مہمان کی خوشخبری مداحوں کو اپنے ایک سوشل میڈیا پیغام کے ذریعے سنائی۔
سماجی رابطے کی ویب سائٹ ٹوئٹر پر حمزہ علی عباسی نے بتایا کہ ’اللہ نے مجھے اور نیمل کو بیٹے محمد مصطفیٰ عباسی کی نعمت سے نوازا ہے۔‘
انہوں نے لکھا کہ ’میری دعا ہے کہ میرا بیٹا اللّہ کا شکر گزار بندہ، ایک اچھا، شائستہ اور ایماندار انسان بنے اور اللّہ اس کی زندگی اور آخرت میں برکت عطا کرے۔‘
اپنے پیغام کے آخر میں حمزہ نے مداحوں سے دعاؤں کی درخواست بھی کی۔
دوسری جانب حمزہ علی عباسی کی اہلیہ نیمل خاور عباسی نے اپنے انسٹاگرام اکاؤنٹ پر بچے کا ہاتھ تھامے ایک تصویر شیئر کی اور ساتھ ’محبت کی سب سے خالص شکل‘ لکھا۔
آخر میں نیمل خاور نے بچے کی تاریخ پیدائش بھی لکھی جس سے معلوم ہوا کے ان کے بیٹے کی پیدائش گزشتہ ماہ 30 جولائی کو ہوئی تھی۔
واضح رہے کہ حمزہ اور نیمل گزشتہ سال 25 اگست کو اسلام آباد میں منعقد ایک سادہ سی تقریب میں رشتہ ازدواج میں منسلک ہوئے تھے۔