08 اکتوبر ، 2020 
ویڈیو: لاہور کے ہوٹل میں قیام پزیر طالبہ کا پولیس اہلکاروں پر ہراساں کرنے کا الزام
08 اکتوبر ، 2020
لاہور کے ایک نجی ہوٹل میں قیام کرنے والی طالبہ نے الزام لگایا ہے کہ پولیس کے دو اہلکار آدھی رات کو اس کے کمرے میں زبردستی گھس آئے اور نازیبا سوالات پوچھے جب کہ ایک نے زبانی ہراساں بھی کیا۔
تھانہ سندر کی حدود میں واقع نجی ہوٹل میں پولیس اہلکاروں کے طالبہ کو ہراساں کرنے کا واقعہ سامنے آیا ہے۔ طالبہ ویڈیو بیان اور واقعے کی سی سی ٹی وی فوٹیج منظر عام پر لے آئی۔
طالبہ کے مطابق اس کا نجی ہوٹل میں قیام تھا کہ اچانک رات ڈھائی بجے کمرے کا دروازہ کھٹکھٹایا گیا، دروازہ کھولنے پر دو پولیس اہلکار زبردستی کمرے میں گھس آئے اور بے معنی سوال کرنے لگے۔ ان کے جانے کے 10 منٹ بعد ایک اور پولیس آفیسر کمرے میں آ گیا اور زبانی ہراساں کرنے لگا جب کہ زبردستی کمرے میں داخل ہونے والا تیسرا پولیس آفیسر خود کو انچارج ظاہر کرتا رہا۔
متاثرہ لڑکی کے مطابق انچارج کہنے والا پولیس آفیسر مجھے غلیظ گالیاں دیتا رہا اور ہراساں کرتا رہا۔
متاثرہ طالبہ کا یہ بھی کہنا ہے کہ تمام شناختی دستاویزات جمع کرانے کے بعد اس نے ہوٹل میں کمرہ لیاتھا۔
دوسری جانب پولیس ترجمان کا کہنا ہے کہ آئی جی پنجاب انعام غنی نے واقعے کا نوٹس لیتے ہوئے سی سی پی او لاہور سے فوری رپورٹ طلب کر لی ہے اور ذمہ داران کا تعین کر کے سخت کارروائی کا حکم دیا ہے۔
