11 دسمبر ، 2020
عالمی وبا کورونا وائرس سے بچاؤ کے لیے ماہرین کی جانب سے فیس ماسک لگانے کی ہدایت کی جا رہی ہے لیکن ایک طرف ماسک لوگوں کی جان کا محافظ ہے تو دوسری طرف یہ ماحول میں آلودگی کا باعث بھی بن رہے ہیں۔
ماسک کی وجہ سے ماحول میں آلودگی میں تیزی سے اضافہ ہو رہا ہے، اس صورتحال کو مدِنظر رکھتے ہوئے حال ہی میں جنوبی کوریا میں ان فیس ماسک کے ذریعے اسٹول تیار کیا گیا ہے۔
جنوبی کوریا کے فرنیچر ڈیزائنر کِم ہانیول نے نا قابل استعمال فیس ماسک کا استعمال کرتے ہوئے بیٹھنے کے قابل اسٹول تیار کیا ہے۔
فرنیچر ڈیزائنر کِم ہانیول نے بتایا کہ ایک اسٹول بنانے کے لیے انہیں 1500 کے قریب ڈسپوزایبل ماسک درکار ہوتے ہیں۔
23 سالہ نوجوان فرنیچر ڈیزائنرر نے امید ظاہر کی ہے کہ وہ آئندہ آنے والے دنوں میں ان ماسک کا استعمال کرتے ہوئے کرسی اور ٹیبل بھی بنائیں گے۔
انہوں نے حکومت سے اپیل کی ہے کہ وہ اسپتال، اسکول اور دیگر جگہوں پر ماسک کلیکشن باکس نصب کر دیں تاکہ لوگ ماسک کوڑے دان میں پھینکنے کے بجائے کلیکشن باکس میں ڈال دیں۔