01 جنوری ، 2021 
سپر ہائی وے پر معروف ہاؤسنگ سوسائٹی کے فلیٹ میں فائرنگ، 3 افراد ہلاک
01 جنوری ، 2021
کراچی میں سپرہائی وے پر معروف نجی ہاؤسنگ سوسائٹی میں فائرنگ کا واقعہ پیش آیا ہے جس میں 3 افراد ہلاک ہوئے ہیں۔
ایس ایس پی ملیر عرفان بہادر نے بتایا کہ سپر ہائی وے پر نجی ہاؤسنگ اسکیم میں رہائشی عمارت کے چوتھے فلور کے اندر ایک نوجوان نے اسلحے کے زور پر گھر میں موجود تمام افراد کو یرغمال بنالیا۔
اطلاع ملتے ہی پولیس کی بھاری نفری موقع پر پہنچ گئی، موقعے پر موجود شوکت حیات نامی شخص نے بتایا کہ یرغمال بنانے والا ان کا بیٹا 28 سالہ شمائل ہے جس کا ذہنی توازن درست نہیں ہے ، وہ اس سے قبل بھی ناقابل برداشت حرکتیں کرچکا ہے۔
تاہم اسی دوران فائرنگ کی آواز آئی اور پولیس فلیٹ پر پہنچی تو معلوم ہوا کہ شمائل نے اپنی ماں 45 سالہ سلمیٰ اور گھریلو ملازم 24 سالہ فاروق کھوسہ کو فائرنگ کرکے قتل کردیا اور اس کے بعد اپنے آپ کو بھی گولی مارلی۔
تینوں کو شدید زخمی حالت میں ہاؤسنگ کے اندر قائم اسپتال لے جایا جارہا تھا کہ تینوں ہی دم توڑ گئے۔
