مولانا فضل الرحمان پیسے لیکر والد کی جاسوسی کیا کرتے تھے: فیاض الحسن چوہان
23 جنوری ، 2021
پنجاب کے وزیر جیل خانہ جات فیاض الحسن چوہان کا کہنا ہے کہ عمران خان پر بی جے پی سے فنڈ لینے کا الزام لگانے والی بیگم صفدر کی بیٹی کی شادی پر مودی پاکستان آئے تھے جبکہ مولانا کے بارے میں مشہور ہےکہ وہ پیسے لیکر والد کی جاسوسی کیا کرتے تھے۔
لاہور میں پریس کانفرنس کرتے ہوئے فیاض الحسن چوہان کا کہنا تھا کہ مولانا فضل الرحمان بچپن میں والد کی مخبری کرتے تھے، وکی لیکس کے مطابق ڈبلیوٹی پیٹرسن کے ساتھ مولانا کی تصویریں موجود ہیں۔
فیاض الحسن چوہان کا کہنا تھا کہ عمران خان کلئیر کٹ کہہ چکے ہیں اسرائیل نامنظور ہے، عمران خان پر بھارت اور اسرائیل کی فنڈنگ کا الزام لگانے والی مریم صفدر بھول گئی ہیں کہ اجیت دول اور نریندر مودی ان کی بیٹی کی شادی پر ان کے گھر آئے تھے، نواز شریف نے ہی وفد اسرائیل بھیجا تھا۔
وزیر جیل خانہ جات پنجاب نے ایک بار پھر سابق حکومت کو مہنگائی کا ذمہ دار ٹھہراتے ہوئے کہا کہ معیشت کو ٹھیک کرنے میں 5 سے 10 سال لگتے ہیں۔
