چوہدری اسلم کی زندگی پر بنی فلم ’چوہدری‘ کا ٹریلر جاری

سندھ پولیس کے شہید سینیئر سپرٹنڈنٹ آف پولیس (ایس ایس پی) چوہدری اسلم کی زندگی پر بنائی جانے والی فلم ’چوہدری‘ کا ٹریلر جاری کردیا گیا۔

مقامی ہوٹل میں منعقدہ تقریب میں پولیس افسران، فنکاروں اور شہید کی فیملی کے افراد نے شرکت کی۔

فلم میں چوہدری کا کردار ان کے ساتھی پولیس افسر طارق اسلام خان نے بخوبی نبھایا ہے۔’تم نے شیر کے منہ میں ہاتھ ڈالا ہے میرا نام چوہدری اسلم ہے‘ چوہدری اسلم کا یہ ڈائیلاگ طارق اسلام نے خوب ادا کیا۔

 تقریب سے ڈی آئی جی ایس ایس یو مقصود میمن، ایس ایس پی مقدس حیدر اور دیگر نے بھی خطاب کیا۔ 

طارق اسلام کا کہنا تھا کہ میری ڈھائی سال پہلے نہا سے ملاقات ہوئی، اس سے چوہدری اسلم شہید کے حوالے سے ڈس کس کیا، یہ فلم بنانے کیلئے ہمارے سابق آئی جی سندھ کلیم امام نے اچھا رسپانس دیا۔

طارق اسلام کا کہنا تھا کہ 1993 کراچی کیلئے برا سال تھا، اس شہر میں کئی پولیس افسران بہادر علی، اسلم حیات کی شہادت ہوئی اور یہ شہر بہت دور چلا گیا۔

ان کا کہنا تھا کہ ہم نے دہشت گردوں کے خلاف جہاد شروع کیا، بہادر الدین بابر، توفیق زاہد، فواد خان شہید ہوئے، یہ سب ہمارے شیر تھے، اس میں ایک شیر تھا ببر شیر محمد اسلم خان تھا۔

پولیس افسران کا کہنا تھا کہ یہ جنگ ابھی رکی نہیں ہے چل رہی ہے۔

شہید ایس ایس پی چوہدری اسلم کی اہلیہ نورین اسلم کاکہنا تھا کہ فلم بنانے میں اہم کردار نہا کا خصوصی شکریہ ادا کرتی ہوں کہ انہوں نے چوہدری کی ویڈیو تیار کی، دعا ہے کہ فلم سپرہٹ ہو، اس شہر سے صرف شیر ہی پیدا ہوتے ہیں۔

نورین نے مزید کہا کہ ہمارے ملک کو ایسے جوانوں کی ضرورت ہے، چوہدری کبھی ڈرا نہیں اس نے دہشت گرد کی آنکھ میں آنکھ ڈال کر جواب دیا۔