کیا ریکھا کی ونود مہرا سے شادی ہوئی تھی؟ بیٹی سونیا مہرا کا بیان سامنے آ گیا

بالی وڈ کے مشہور اداکار ونود مہرا کی بیٹی سونیا مہرا  نے والد اور اداکارہ  ریکھا کی شادی سے متعلق بھارتی میڈیا کو دیے گئے انٹرویو کے انکشافات کیے ہیں۔

بھارتی میڈیا کو دیے گئے انٹرویو کے دوران سونیا مہرا سے جب یہ سوال کیا گیا کہ وہ اپنے والد کی کون سی دو فلموں کے ری میک میں مرکزی خواتین کا کردار نبھانا چاہیں گی؟سونیا مہرا نے جواب دیا کہ میری پہلی ترجیح بھارتی فلم ’’گھر’’ہو گی اور دوسری’’ دی برننگ ٹرین‘‘۔

سونیا کے مطابق 1978 میں مانیک چترجی کی ہدایت میں بننے والی بھارتی فلم ’’گھر‘‘ میں وہ بھارت کی لیجنڈ اداکارہ ریکھا کا کردار ادا کرنے کی خواہش مند ہیں۔

واضح رہے کہ ماضی میں ریکھا کا نام ( امیتابھ بچن کی طرح ) ونود مہرا کے ساتھ بھی لیا جاتا رہا، کہا جاتا رہا کہ ریکھا نے ونود مہرا سے دوسری شادی کی تھی تاہم ریکھا اس حوالے سے تردید کر چکی ہیں۔

سونیا نے بھارتی میڈیا کو بتایا کہ ریکھا سے میری ملاقات 3 سے 4 مرتبہ سماجی تقاریب میں ہوئی، وہ ایک خوبصورت اور توجہ کی حامل خاتون ہیں۔

ریکھا سے ونود کی شادی کی افواہوں سے متعلق سونیا کا کہنا تھا کہ میں اس سوال پر تبصرہ نہیں کر سکتی کیونکہ میں نہیں جانتی، والد کا انتقال اس وقت ہوا جب میں ڈیڑھ سال کی تھی۔

ونود مہرا کی صاحبزادی نے بھارتی میڈیا کو بتایا کہ سچ کہوں تو  مجھے بھی اس پر تبصرہ کرنے کا حق نہیں ہے کیونکہ یہ ان کی زندگی ہے۔

سونیا کا مزید کہنا تھا کہ ہر ایک کا اپنا ماضی ہوتا ہے اور اس سے متعلق فیصلہ کرنے اور پوچھ گچھ کرنے کا مجھے حق نہیں، اگر یہ اہم ہے تو مجھے بتا دیا جائے گا۔