برطانوی کورونا وائرس کا پھیلاؤ، لاہور سمیت پنجاب کے 5 اضلاع ہائی رِسک قرار

لاہور سمیت صوبہ پنجاب کے 5 اضلاع کو کورونا وائرس سے متعلق ہائی رِسک قرار دے دیا گیا۔

لاہور میں کورونا وائرس ایک مرتبہ پھر تیزی سے پھیلنے لگا  اور مثبت کیسز کا تناسب 12.67 فیصد تک پہنچ گیا۔ گزشتہ 24 گھنٹوں کے دوران 991 نئے مریض سامنے آئے  جو شہر میں ایک سال کے دوران کورونا سے متاثر ہونے والوں کی یہ سب سے زیادہ تعداد ہے۔

اب تک لاہور میں 94 ہزار 292 افراد کورونا وائرس میں مبتلا ہوئے جبکہ 2 ہزار 303 مریض زندگی کی بازی ہار گئے۔

دوسری جانب وزیراعلیٰ پنجاب عثمان بزدار کی زیر صدارت کابینہ کمیٹی برائے کورونا کا اجلاس ہوا جس میں پنجاب میں کورونا کی تیزی سے پھیلتی ہوئی صورت حال پر تشویش کا اظہار کیا گیا۔

ذرائع کے مطابق اجلاس کو بتایا گیا کہ پنجاب میں برطانیہ سے آنے والا نیا کورونا وائرس پھیل رہا ہے جبکہ 200 کے قریب مریض اب تک اس وائرس میں مبتلا ہو چکے ہیں، دیگر کی صورتحال مزید جینیاتی ٹیسٹوں کے بعد سامنے آئے گی۔

وزیراعلیٰ عثمان بزدار کا کہنا تھا کہ برطانیہ کا وائرس کچھ شہروں میں تشویشناک حد تک پھیل رہا ہے جس کے باعث 5 فیصد سے زائد شرح کے اضلاع میں ہفتہ اور اتوار کی درمیانی رات سے اگلے 15 دن تک سخت ایس او پیز لا رہے ہیں۔

کورونا کے حوالے سے ہائی رسک قرار دیے گئے اضلاع میں لاہور، ملتان، فیصل آباد، گوجرانوالا اور سرگودھا شامل ہیں، ان اضلاع میں تعلیمی اداروں، پارکس، ان ڈور شادی ہالز، مزارات، میلوں اور کھیلوں کی سرگرمیوں پر پابندی ہو گی جبکہ مارکیٹیں شام 6 بجے تک بند کر دی جائیں گی۔ 

وزیراعلیٰ کا کہنا تھا کہ اسمارٹ لاک ڈاؤن اور ایس او پیز پر سختی سےعملدرآمد کے احکامات دیے ہیں اور یہ حفاظتی اقدامات کورونا وائرس کا خطرناک پھیلاؤ روکنے میں مدد دیں گے۔ 

اُدھر صوبائی اسپورٹس بورڈ نے تمام اضلاع میں کھیلوں کی سرگرمیوں پر پابندی لگا دی۔

مزید خبریں :