28 اپریل ، 2021 
خوشاب ضمنی الیکشن، الیکشن کمشنر پنجاب کا تیاریوں پر اظہار اطمینان
28 اپریل ، 2021
الیکشن کمشنر پنجاب غلام اسرار خان نے پی پی 84 خوشاب کے ضمنی الیکشن کی تیاریوں پر اطمینان کا اظہار کرتے ہوئے کہا ہے کہ اسلحے کی نمائش اور ہوائی فائرنگ پر سخت پابندی ہے، امیدوار انتخابی ضابطہ اخلاق پر عملدرآمد یقینی بنائیں۔
صوبائی الیکشن کمشنر غلام اسرار خان نے پی پی 84 خوشاب کا دورہ کیا، اس موقع پر ضمنی الیکشن کے حوالے سے ڈپٹی کمشنر خوشاب مسرت جبین نے ٹرانسپورٹیشن پلان اور دیگر انتظامی امور جبکہ ڈی پی او محمد نوید نے سکیورٹی پلان کے حوالے سے بریفنگ دی۔
الیکشن کمشنر پنجاب نے سکیورٹی اور دیگر انتخابی امور کے انتظامات پر اطمینان کا اظہار کیا اور امیدواروں سے ملاقات میں انتخابی ضابطہ اخلاق پر عملدرآمد یقینی بنانے پر زور دیتے ہوئے کہا کہ امیدواران اپنے پولنگ ایجنٹس کی تربیت کو یقینی بنائیں۔
غلام اسرار خان کا مزید کہنا تھا کہ پولنگ ایجنٹ پریزائیڈنگ آفیسر سے فارم 45 وصول کیے بغیر پولنگ پولنگ اسٹیشن نا چھوڑیں۔
یاد رہے کہ پی پی 84 خوشاب کی نشست مسلم لیگ ن کے رکن پنجاب اسمبلی وارث کلو کی وفات کے باعث خالی ہوئی تھی اور الیکشن کمیشن نے حلقے میں 5 مئی کو ضمنی الیکشن کروانے کا اعلان کر رکھا ہے۔
