جاں بحق پولیس اہلکاروں کی فلم بنانے اور ان کا مذاق اڑانے پر شہری کو 10 ماہ قید کی سزا

آسٹریلیا میں حادثے کے دوران مرنے والے پولیس اہلکاروں کی ویڈیو بنانے اور ان کی نقل اتارنے کے جرم میں عدالت نے 42 سالہ رچرڈ  کو 10 ماہ قید کی سزا سنادی۔

آسٹریلیا کے 42 سالہ شہری رچرڈ پوسے کو وکٹوریا کی عدالت نے عوامی شائستگی کی خلاف ورزی سمیت دیگر الزامات پر سزاسنائی ہے۔

جج نےرچرڈ پوسے کے مرنے والے پولیس اہلکاروں کی ویڈیو بنانے کے اقدام کوسنگ دل، ظالمانہ اور ذلت آمیز قرار دیا۔

خیال رہے کہ گزشتہ سال ملیبرن کے ہائی وے پر چار پولیس اہلکاروں نے رچرڈ پوسے کو تیز رفتاری پر روکا تھا لیکن یہ پولیس اہلکار ٹرک کی ٹکر میں مارے گئے تھے، اس دوران رچرڈ نے اپنے فون سے پولیس اہلکاروں کی ویڈیو بنائی تھی۔

اس ویڈیو پر آسٹریلیا بھر کے عوام میں غم و غصے کی لہر دوڑ گئی تھی۔