30 اپریل ، 2021 
جان ابراہم نے اپنے سوشل میڈیا اکاؤنٹس این جی او کے حوالے کردیے
30 اپریل ، 2021
بالی وڈ اداکار جان ابراہم نے کورونا کی بدترین صورتحال میں متاثرین کی مدد کیلئے اپنے سوشل میڈیا اکاؤنٹس این جی اوز کے حوالے کردیے۔
کورونا وائرس کے باعث بھارت میں حالات ابتر ہوتے جارہے ہیں جبکہ ایسے میں بالی وڈ شخصیات بھی مدد کیلئے میدان میں آگئی ہیں۔
بالی وڈ کے اداکار اپنی مدد آپ کے تحت کورونا سے متاثرہ افراد کی مدد کررہے ہیں جبکہ ہر اداکار کسی نا کسی انداز میں متاثرین کی مدد میں جُتا ہوا ہے۔
اب بالی وڈ اداکار جان ابراہم بھی میدان میں آئے ہیں اور کورونا متاثرین کی مدد اور درست معلومات کیلئے اپنے سوشل میڈیا اکاؤنٹس این جی اوز کے حوالے سے کردیے ہیں۔
اداکار نے اپنی پوسٹ میں لکھا کہ میں نے آج سے اپنے اکاؤنٹ این جی اوز کے حوالے کردیے ہیں، اب سے میرے اکاؤنٹ سے شیئر کیا گیا مواد متاثرین کی مدد اور ضرورتوں کیلئے ہوگا۔
اداکار کی اس پوسٹ کے بعد ان کے اکاؤنٹ سے متاثرین کی مدد اور متعلقہ معلومات پر مبنی پوسٹس شیئر کی جارہی ہیں۔
جان ابراہم کے فیس بک پر ایک کروڑ سے زائد، انسٹاگرام پر 88 لاکھ اور ٹوئٹر پر 32 لاکھ فالوورز ہیں۔
