06 مئی ، 2021
معروف بھارتی گلوکار اور موسیقار ارجیت سنگھ کی والدہ ناسازی طبیعت کے باعث اسپتال میں داخل ہیں اور بھارتی اداکارہ سواستیکا مکھرجی نے ان کے لیے خون کے عطیہ دینے کی اپیل کی ہے۔
بھارتی میڈیا کے مطابق ارجیت سنگھ کی والدہ کلکتہ کے ایک اسپتال میں زیر علاج ہیں تاہم ان کی بیماری کی نوعیت کا پتہ نہیں چل سکا۔
بالی وڈ اور بنگالی فلموں کی معروف اداکارہ سواستیکا مکھرجی اور فلم ڈائریکٹر سرجیت مکھر جی نے سوشل میڈیا پر ارجیت کی والدہ کے لیے خون کا عطیہ دینے کی اپیل کی ہے۔
ارجیت سنگھ یا ان کے خاندان کی جانب سے اس حوالے سے کوئی بیان نہیں آیا ہے تاہم سواستیکا مکھرجی کی پوسٹ کے بعد مداحوں کی جانب سے ان کی والدہ کی صحت کے لیے نیک تمناؤں کا اظہار کیا جارہا ہے۔
خیال رہے کہ کورونا وائرس نے بھارت کو اپنی لپیٹ میں لے لیا ہے اور مریضوں میں اضافے کے بعد آکسیجن سمیت طبی آلات کی شدید قلت پیدا ہوگئی ہے۔