18 مئی ، 2021 
ماہرہ خان نے فرانس کی معروف کمپنی کو ان فولو کردیا
18 مئی ، 2021
سپر اسٹار ماہرہ خان کو میک اپ کے نامور برانڈ لوریل کی برانڈ ایمبیسڈر ہونے کا اعزاز حاصل ہے اور وہ یہ اعزاز پانے والی پہلی پاکستانی اداکارہ ہیں۔
تاہم اب حیرت انگیز بات یہ ہے کہ ماہرہ خان نےمقبول فوٹوشیئرنگ ایپ انسٹاگرام پر لوریل کو ان فولو کردیا ہے۔
میڈیا رپورٹس میں دعویٰ کیا جارہا ہے کہ ماہرہ نے یہ قدم اسرائیل کے جنگی حملوں کے خلاف اور فلسطین سے اظہار یکجہتی کے طور پر اٹھایا ہے۔
اداکارہ اس سے قبل بھی پاکستان کی دیگر شوبز شخصیات کی طرح فلسطین سے اظہار یکجہتی کے لیے آواز بلند کرتی رہی ہیں۔
اداکارہ کی جانب سے حال ہی میں انسٹاگرام اسٹوری پر فلسطین سے متعلق چند تصاویر پوسٹ کی گئی ہیں جس میں بتایا گیا ہے کہ ہم فلسطین کی مدد کس طرح کرسکتے ہیں۔
دوسری جانب اداکارہ نے ٹوئٹر پر ری ٹوئٹ کرتے ہوئے فلسطین سے اظہار یکجہتی کے لیے کراچی پریس کلب میں ہونے والے احتجاج میں شرکت کے لیے مداحوں پر زور دیا۔
اداکارہ نے اپنی ٹوئٹ میں اسرائیل دہشتگرد کا ہیش ٹیگ بھی استعمال کیا۔
