گریڈ 1 سے 19 تک کے ملازمین کیلئے حکومت پنجاب کا بڑا فیصلہ
20 مئی ، 2021
تنخواہ کے علاوہ دیگر الاؤنس سے محروم گریڈ 1 سے 19 تک کے ملازمین کے لیے حکومت پنجاب نے بڑا فیصلہ کرلیا۔
اگلے ماہ سے ان ملازمین کو 25 فیصد ماہانہ اسپیشل الاؤنس دیا جائے گا۔
وزیراعلیٰ پنجاب عثمان بزدار نے کہا ہے کہ اس فیصلے کا مقصد سرکاری ملازمین کی تنخواہوں میں فرق کم کرنا اور ان کی معاشی حالت بہتر بنانا ہے۔
وزیراعلیٰ پنجاب کی زیر صدارت تنخواہوں میں تفاوت دور کرنے کے لیےکمیٹی کا اجلاس ہوا جس میں محکموں کی غیر ضروری اسامیاں ختم کرنے پر غوربھی کیا گیا۔
وزیراعلیٰ پنجاب عثمان بزدارکا کہنا تھا کہ سرکاری ملازمین کو ان کا حق ضرور دیں گے، مہنگائی کے تناسب سے تنخواہوں میں اضافہ ان کی ضرورت ہے، ملازمین کی ضروریات اور مسائل کا احساس ہے، چھوٹے سرکاری ملازمین کے معاشی مسائل ترجیحی بنیادوں پر حل کریں گے۔
وزیراعلیٰ نے بازوؤں سے محروم خانیوال کی لڑکی شہناز بی بی کی مالی امداد کا اعلان بھی کیا۔ ڈپٹی کمشنر نے شہناز بی بی کو مالی امداد کا چیک اور برقی سلائی مشینیں دیں۔
عثمان بزدار کا کہناہےکہ شہناز بی بی کے عزم، ہمت اورحوصلے کی قدر کرتے ہیں، وہ قوم کی باہمت بیٹی ہے۔
