23 جون ، 2021 
کلفٹن میں نجی بینک کا لاکر توڑ کر 250 تولہ سونا لوٹ لیا گیا
23 جون ، 2021
کراچی کے علاقے کلفٹن میں زمزمہ اسٹریٹ پر واقع نجی بینک میں ایک خاندان کا لاکر توڑ کر نامعلوم ملزمان 250 تولہ سے زائد کے سونے کے زیورات لے کر فرار ہو گئے۔
پولیس کے مطابق کلفٹن بلاک 4 کی رہائشی ڈاکٹر انیتا قاضی نے رپورٹ درج کرائی ہے کہ انہوں نے زمزمہ اسٹریٹ پر واقعہ فیصل بینک میں خاندان کا مشترکہ لاکر لیا تھا، جس میں خاندان کی خواتین کے تمام زیورات مشترکہ طور پر رکھے گئے تھے۔
خاتون کے مطابق بدھ کی دوپہر وہ اپنا لاکر چیک کرنے کے لیے بینک آئیں اور بینک کے آفیسر جہانزیب خان کے ہمراہ چابی لے کر لاکرز روم میں گئیں تو دیکھا کہ ان کا لاکر ٹوٹا ہوا تھا جسے کسی ملزم یا ملزمان نے باقاعدہ طور پر آہنی اوزاروں سے کاٹا تھا۔
خاتون کے مطابق لاکر بالکل خالی تھا جس میں سے ان کے تمام زیورات جو 250 تولے سے زائد وزن کے ہیں، چوری ہوگئے ہیں۔
ایس ایچ او کلفٹن پیر شبیر حیدر کے مطابق خاتون کی مدعیت میں مقدمہ درج کر لیا گیا ہے۔
