فیصل قریشی کا ٹرولنگ کرنے والوں کو سخت پیغام

پاکستان کے سینئر اداکار و میزبان فیصل قریشی نے ٹرول کرنے والے صارفین کیلئے اپنا پیغام جاری کیا ہے۔

کچھ روز قبل فیصل قریشی کے پروگرام کی ایک ویڈیو سوشل میڈیا پر وائرل ہوئی تھی جس میں وہ لائیو شو کے دوران خاتون ٹک ٹاکر پر برس پڑے۔

میزبان نے اب انسٹاگرام پر اسٹوری پوسٹ کرتے ہوئے وضاحت پیش کی اور لکھا کہ کسی کی تصحیح کرنے کی کوشش کرنے کا یہ مطلب نہیں کہ اسے نیچا دکھایا جارہا ہو،  میں اس اسٹیج پر ہوں جہاں ٹرولنگ کے وقت اپنا کام جاری نہیں رکھ سکتا کیونکہ یہ بھی بدسلوکی کی ایک قسم ہے۔

انہوں نے سوشل میڈیا پر تنقید کرنے والوں پر تعجب کا اظہار کیا اور لکھا مجھے سمجھ نہیں آتا ہم ہر اس چیز کو فروغ کیوں دیتے ہیں جو منفیت کا باعث ہوتی ہے۔

فیصل قریشی نے سوشل میڈیا صارفین کو سمجھاتے ہوئے لکھا کہ دوسروں کی ٹانگ کھینچنا اور منفی رویے اب بہت ہوگئے، لکھنے سے پہلے لازمی سوچیں، سوچیں کہ کیا یہ سچ ہے، کیا یہ دوسروں کیلئے مددگار ثابت ہوگا، کیا یہ متاثر کن ہے، کیا یہ اہم ہے، کیا یہ دوسروں کیلئے مہربانی کا باعث ہوگا۔

خیال رہے کہ اداکار فیصل قریشی کی ٹک ٹاکر کو ڈانٹنے کی ویڈیو تیزی سے وائرل ہورہی ہے جب کہ سوشل میڈیا کے متعدد صارفین میمز کے ذریعے ٹک ٹاکرز کو تنقید کا نشانہ بنارہے ہیں۔