Can't connect right now! retry

بلاگ
09 جولائی ، 2021

نئی سیاسی صف بندیاں

 آئندہ عام انتخابات اگر شیڈول کے مطابق اکتوبر2023میں ہوں تو ابھی بہت دور ہیں۔ لیکن عمران خان ، آصف علی زرداری اور نواز شریف نے ابھی سے کامیابی کیلئے سیاسی گٹھ جوڑ شروع کر دئیے ہیں۔ چونکہ زیادہ توجہ پنجاب کے آئند ہ سیاسی منظر نامے پر ہوگی اس لئے چھوٹی پارٹیوں اور پارٹیوں کے اندر مایوس عناصر سے رابطوں کی کوششیں بھی کی جارہی ہیں ۔

اس پس منظر میں بدھ کو وزیراعظم عمران خان کی مسلم لیگ (ق) کے رہنما چوہدری پرویز الہی ٰ اور ان کے بیٹے چوہدری مونس الہی ٰسے ملاقات سیاسی اہمیت کی حامل ہے۔ ایک زمانے میں مونس الہیٰ عمران خاں کو پسند نہیں تھے، انہیں کابینہ میں بھی شامل نہیں کیا تھا۔

اب یہ ملاقات ان اطلاعات کے بعد ہوئی ہے کہ آصف علی زرداری اور چوہدری پرویز الہیٰ کی دو گھنٹے علیحدگی میں ملاقات میں ان میں سیاسی مفاہمت ہوئی ہے۔ بدھ کی ملاقات میں وزیراعظم کے ساتھ شاہ محمود قریشی اور شفقت محمود سمیت پنجاب کی قیادت بھی موجود تھی۔

ذرائع کے مطابق جہانگیر ترین کا معاملہ بھی زیر غور آیا۔ چوہدری پرویز الہیٰ نے وزیر اعظم کو آصف زرداری سے اپنی ملاقات کے بارے میں بھی اعتماد میں لیا اور پیپلز پارٹی کے امیدواروں کو دستبردار کراکے پنجاب سے سینیٹروں کے بلا مقابلہ انتخاب میں مدد دینے میں آصف زرداری کے کردار کا بھی ذکر کیا۔

دلچسپی کی بات یہ ہے کہ دونوں ملاقاتوں کا مقصد ایک ہی تھا کہ مسلم لیگ ن کا راستہ کیسے روکا جائے جس نے تمام حربوں کے باوجود اپنا ووٹ بنک برقرار رکھا ہے۔ پی ٹی آئی، پی پی پی اور مسلم لیگ ق تینوں کے کیمپوں میں اس پر تشویش ہے۔

واحد چیز جو مسلم لیگ ن کے ووٹ بنک کو نقصان پہنچا سکتی ہے وہ پارٹی کے دو بیانیوں پر کنفیوژن ہوسکتا ہے، یعنی ایک نواز شریف اور مریم نواز کا اور دوسرا شہباز شریف کا۔زیادہ امکان یہی ہے کہ پی ڈی ایم انتخابی اتحاد کی بجائے سیٹ ایڈجسٹمنٹ کا فیصلہ کرے گی۔ مسلم لیگ ن اور جے یو آئی ف میں اس سلسلے میں مفاہمت ہوچکی ہے۔

زیادہ امکان یہی ہے کہ عمران خاں تنہا پرواز کریں گے۔ان کے مسلم لیگ ق یا ایم کیو ایم پاکستان کے ساتھ انتخابی اتحاد کا امکان بہت کم ہے۔البتہ وہ گجرات کے چوہدریوں اور جنوبی پنجاب صوبہ محاذ سے سیٹ ایڈ جسٹمنٹ کرلیں گے۔ پی ٹی آئی کا ایک اور کمزور علاقہ سندھ ہے۔ کراچی سے سنگین تنظیمی مسائل کی بھی اطلاعات ہیں۔

اگرچہ کراچی کی 20 نشستوں میں سے 14 پی ٹی آئی نے اور چار ایم کیو ایم پاکستان نے جیتیں اور اب حکومتی اتحاد میں شریک ہیں لیکن دونوں انتخابی اتحاد بنانے پر تیار نہیں۔

دیہی سندھ میں پی ٹی آئی کیلئے حالات مزید خراب ہیں۔ وہاں عمران خاں کیلئے اپنے اتحادی گرینڈ ڈیموکریٹک الائنس جی ڈی اے پر انحصار کے سوا کوئی چارہ نہیں ہوگا۔وزیراعظم کی بدھ کو سابق وزیراعلیٰ ارباب غلام رحیم سے ملاقات اسی سلسلے میں تھی۔ پیپلز پارٹی اور آصف زرداری سندھ کے دیہی اور شہری دونوں علاقوں سے زیادہ سے زیادہ نشستیں حاصل کرنے کیلئے کوشاں ہیں۔ کراچی، حیدر آباد،میرپور خاص اور دیہی سندھ کے بعض اضلاع میں وہ ہمیشہ کمزور رہے ہیں ۔

لیکن پی ٹی آئی اور ایم کیو ایم کی کمزور پوزیشن کو مد نظر رکھتے ہوئے زرداری نے 2018 کے مقابلے میں کچھ زیادہ نشستیں حاصل کرنے کا منصوبہ بنایا ہے۔ پنجاب میں بھی انہیں جنوب سے کچھ زیادہ نشستوں کی توقع ہے۔


جیو نیوز، جنگ گروپ یا اس کی ادارتی پالیسی کا اس تحریر کے مندرجات سے متفق ہونا ضروری نہیں ہے۔

Notification Management


پاکستان
دنیا
کاروبار
کھیل
انٹرٹینمنٹ
صحت و سائنس
دلچسپ و عجیب

ڈیسک ٹاپ نوٹیفکیشن کے لیے سبسکرائب کریں
Powered by IMM