ساحل پر دھنسنے والا بحری جہاز کے پی ٹی کی حدود میں داخل نہیں ہوا: علی زیدی
23 جولائی ، 2021
وفاقی وزیر برائے پورٹس اینڈ شپنگ علی زیدی نے کہا ہے کہ کراچی کے سا حل پر دھنسنے والا جہاز کراچی پورٹ ٹرسٹ کی حدود میں داخل نہیں ہوا۔
علی زیدی کا کہنا ہے کہ جہاز عملے کی تبدیلی کے لیے پاکستانی سمندری حدود میں آیا، بحری جہاز کا انجن خراب تھا، خراب موسم کی وجہ سےکم پانی کی طرف مڑا۔
ان کا کہنا ہے کہ کراچی بندرگاہ پر رابطے سے قبل ہی جہاز ساحل تک پہنچ چکا تھا، بحری جہاز نکالنے کے لیے آنے والے اخراجات اور نقصان کا ازالہ جہاز کا مالک کرے گا۔
وفاقی وزیر نے کہا کہ سمندری جہاز پانی میں آدھے میٹر کی سطح پر موجود ہے، سمندری جہاز کو نکالنے کے لیے کم از کم 5 میٹر کی سطح چاہیے ہوتی ہے۔
انہوں نے مزید کہا کہ آج حکام کے ساتھ معاملات طے کرنے پر غور ہو گا، جہاز پانامہ میں رجسٹرڈ ہے اور وہاں کی انتظامیہ سے رابطہ قائم کر لیا ہے۔
یاد رہے کہ تین روز قبل کراچی کے ساحل پر کنٹینرز سے لدا بحری جہاز سی ویو کے قریب پھنس گیا تھا۔
