ترکی کے جنگلات میں آگ لگنے کے واقعات، مختلف حادثات میں 4 افراد ہلاک
30 جولائی ، 2021
ترکی کے ایجیئن اور بحیرہ روم کے ساحل پر موجود 21 اضلاع کے جنگلات میں لگی آگ پر قابو پانے کی کوششیں جاری ہیں جبکہ مختلف حادثات میں 4 افراد ہلاک ہوگئے۔
ترکی کے جنوبی حصے میں موجود رواں ہفتے بحیرہ روم ریزورٹ ریجن میں جنگلات میں آگ لگنے کے متعدد واقعات رونما ہوئے جس کے بعد دیکھتے ہی دیکھتے آگ پھیل گئی۔
ترک حکام کے مطابق گرم موسم اور تیز ہوائیں آگ کو پھیلنے میں مدد دے رہی ہیں، جنگلات میں لگی آگ پر قابو پانے میں وقت لگے گا۔
مقامی حکام کا کہنا ہے کہ آگ کے لپیٹ میں آنے کے خدشے پر انطالیہ کے 18 گاؤں اور اضلاع خالی کرالیے گئے ہیں جبکہ آدانا اور مرسین میں 16 علاقوں سے لوگوں کا انخلا کرایا گیا ہے۔
اس کے علاوہ سیاحتی شہر بودرم کے قریب ایک ہوٹل بھی خالی کرایا گیا ہے۔
دوسری جانب 4ہزار سے زائد فائرفائٹرز آگ پر قابو پانے کی کوششوں میں مصروف ہیں، اس کے علاوہ آگ بھجانے کے آپریشن میں جہاز اور ہیلی کاپٹرز سمیت دیگر بھی شریک ہیں۔
فائر فائٹرز کی مسلسل کوششوں کے بعد 63 میں سے 43 مقامات پر آگ پر قابو پالیا گیا جبکہ مختلف حادثات میں اب تک 4 افراد ہلاک اور 180 سے زائد افراد زخمی ہوگئے۔
